Mayın 21-də “Zərgərlik fəaliyyəti: mövcud vəziyyət və perspektivlər” mövzusunda biznes forum keçirilib. Kiçik və Orta Biznesin İnkişafı Agentliyi (KOBİA) yanında İctimai Şuranın təşkilatçılığı, KOBİA-nın dəstəyi və Azərbaycan Zərgərlər Assosiasiyasının tərəfdaşlığı ilə keçirilmiş tədbirdə zərgərlik sahəsində fəaliyyət göstərən sahibkarlar və müvafiq dövlət qurumlarının, o cümlədən İqtisadiyyat Nazirliyi, Dövlət Vergi Xidməti, Antiinhisar və İstehlak Bazarına Nəzarət Dövlət Xidməti, Dövlət Gömrük Komitəsi, “AzerGold” QSC və AZPROMO-nun nümayəndələri iştirak ediblər.
KOBİA yanında İctimai Şuranın sədri Fərhad Qaraşov qeyd edib ki, forum zərgərlik sahəsinin inkişafı üçün dövlət-biznes dialoqunun aparılması, zərgərlik bazarının inkişaf etdirilməsi imkanlarının və bazar iştirakçılarının rəqabətədavamlı fəaliyyətinə təsir edən amillərin müzakirə olunması, sahibkarların təkliflərinin aidiyyəti qurumlara çatdırılması məqsədilə təşkil olunub.
Tədbirdə çıxış edən KOBİA-nın İdarə Heyətinin sədri Orxan Məmmədov zərgərlik sektorunda həyata keçirilən tədbirlər barədə məlumat verərək, bu sahədə cari ilin əvvəlindən tətbiq olunan vergi güzəştlərini, zərgərlik sənayesində islahatların aparılması üçün təkliflərin hazırlanması üzrə işçi qrupunun və dövlət dəstəyi ilə zərgərlər assosiasiyasının yaradılmasını qeyd edib. Forumun zərgərlik sahəsində aparılan islahatlar barədə sahibkarlarda dolğun təsəvvürün yaranmasında, sektorda baş verən dəyişikliklərin effektivliyinin qiymətləndirilməsində əhəmiyyətli olacağını vurğulayıb.
“AzerGold” QSC-nin İdarə Heyətinin sədri Zakir İbrahimov rəhbərlik etdiyi qurumun yerli sənayenin vacib sahələrindən olan zərgərliyin inkişaf etdirilməsi ilə bağlı layihələrdə fəal iştirak etdiyini qeyd edərək, cəmiyyətin zərgərlik sənayesinin inkişafına yönələn təşəbbüsləri və mövcud problemlərin aradan qaldırılmasına dair təkliflərini bölüşüb. Aparılan islahatların zərgərlik sahəsində nəzərəçarpacaq inkişafa səbəb olacağını qeyd edən Z.İbrahimov “AzerGold”un dövlət şirkəti olaraq qiymətli metalların xammal tədarükçüsü kimi də zərgərlik sənayesinin inkişafına töhfə verməyə hazır olduğunu vurğulayıb.
İqtisadiyyat Nazirliyi yanında Dövlət Vergi Xidmətinin rəis müavini Samirə Musayeva cari ilin əvvəlində Vergi Məcəlləsinə zəgərlik fəaliyyəti ilə bağlı edilmiş dəyişikliklər və vergi güzəştləri barədə təqdimatla çıxış edib.
Azərbaycan Zərgərlər Assosiasiyasının İdarə Heyətinin sədri Toğrul Abbasquliyev çıxışında zərgərlik sənayesinin mövcud vəziyyəti və sektorun gözləntiləri barədə məlumat verib.
Tədbir çərçivəsində Azərbaycanda zərgərlik fəaliyyəti, yerli zərgərlik məhsullarının istehsalı, sahibkarların çətinlikləri və sektorla bağlı gözləntilərə dair müzakirələr aparılıb, sahənin inkişafı üçün təkliflər səsləndirilib, müvafiq qurumlar tərəfindən sahibkarları maraqlandıran suallar cavablandırılıb.
