Azərbaycan 24-26 martda Tacikistanın paytaxtı Düşənbədə keçirilmiş “Oks Xəzinələrinin Mənbəyi” adlı beynəlxalq mədənçilik və zərgərlik forum-sərgisində iştirak edib. Azərbaycanı adıçəkilən forum-sərgidə Azərbaycan Zərgərlər Assosiasiyasının sədr müavini Rövşən Əmircanov, TAC GOLD şirkəti və MİNALI brendi təmsil ediblər.
Tədbirdə təxminən 50 yerli zərgərlik müəssisəsi ilə yanaşı, Azərbaycan, Hindistan, İran, Çin, Birləşmiş Ərəb Əmirlikləri, Pakistan, Rusiya, Türkiyə, Türkmənistan, Özbəkistan, Avropa İttifaqı ölkələri və Yaxın Şərq də daxil olmaqla, müxtəlif ölkələrdən 200-dən çox xarici nümayəndə iştirak ediblər.
Tədbirin əsas məqsədləri zərgərlik sektorunda əlavə dəyər zəncirinin bütün mərhələlərini əhatə edən beynəlxalq tərəfdaşlarla əməkdaşlığın gücləndirilməsi, dağ-mədən və zərgərlik istehsalı sahəsində fəaliyyət göstərən şirkətlər arasında işgüzar əlaqələrin qurulması və onların davamlı inkişafının təmin edilməsi olub.
