22-25 iyun 2023-cü il tarixlərində Rusiyanın Kaliniqrad vilayətinin Svetloqorsk şəhərində “Kəhrəba Kainatı 2023” adlı VI Beynəlxalq Forum keçirilmişdir.
“Kəhrəba Kainatı” mövzusunda keçirilən forumda Rusiyadan və dünyanın bir sıra ölkələrindən dövlət qurumlarının və peşəkar biznes ictimaiyyətinin, məşhur zərgərlik brendlərinin nümayəndələri, həmçinin qiymətli daş mütəxəssisləri iştirak etmişdirlər.
Tədbirdə kəhrəbanın moda brendi kimi potensialını, rəqabətli bazarda effektiv satış vasitələrini, həmçinin məhsulların ixracı və bu sənayeyə kadrların cəlb edilməsi məsələləri müzakirə edilmişdir.
Forumda ölkəmizi Azərbaycan Zərgərlər Assosiasiyasının üzvü, “AzerGold” QSC-nin Strateji planlaşdırma və layihələrin inkişafı şöbəsinin Baş mütəxəssisi, “Qiymətli metallar və qiymətli daşlar” standartlaşdırma üzrə texniki komitənin sədri Rövşən Əmircanov təmsil etmişdir.
Rövşən Əmircanov “AmberForum 2023” proqramının panel müzakirəsində spiker kimi çıxış edərək Azərbaycanın zərgərlik sənayesi, ”Azərbaycan Zərgərlər Assosiasiyası” Ictimai Birliyinin, “Qiymətli metallar və qiymətli daşlar” standartlaşdırma üzrə texniki komitənin fəaliyyəti, Azərbaycanda mövcud olan minerallar və kəhrəba, ölkəmizdə tətbiq olunan vergi və gömrük güzəştləri, həmçinin milli brendlər haqqında geniş məlumat vermişdir.
